Grafinco recibe a visita de todas as xerencias das iniciativas de COGAMI Empresarial

O pasado mes de novembro celebrouse en Lugo a reunión anual das xerencias das empresas que conforman COGAMI Empresarial. Grafinco, a imprenta que COGAMI ten en Lugo, foi a anfitrioa deste encontro. Durante a xornada, as xerencias visitaron as súas instalacións para coñecer de primeira man as novas liñas de negocio, como a innovación no packaging de pequeno formato e a impresión téxtil, que están postas en marcha. O obxectivo deste encontro foi avaliar o transcurso do ano e establecer os principais retos e compromisos para o exercicio de 2025. Na xuntanza afondouse nos retos compartidos e nas oportunidades de cooperación entre as dez iniciativas que conforman o grupo de empresas. Para Rosa Gutiérrez, a directora de Negocio de Galega de Economía Social, o grupo no que se integra Grafinco, “manter a unión entre as empresas é clave para potenciar as nosas fortalezas e lograr sinerxías nun mercado cada vez máis competitivo”, apuntaba na súa intervención.