3,2,1…2021!

Decembro. Hai quen conta os días para que chegue o descanso do Nadal. Hai quen prefire dar o salto para deixar paso ao Ano Novo. Hai quen aproveita para avaliar resultados e emprender os 12 novos meses con novos bríos. Sexa como sexa, os meses previos ao Nadal son unha conta atrás balizada de propósitos.

Para moitas empresas é o momento ideal para lembrarlle á súa comunidade de clientas/es e seguidoras/es que ela é a base do seu proxecto empresarial. Como mima e fideliza a esta clientela, é a clave que distingue a unha empresa que prioriza este aspecto doutra que non o fai.

Para lembrarllo hai moitas maneiras. Pero unha delas leva o gato á auga: calendarios anuais. Porque menos é máis e porque non hai fórmula máis sinxela para coarse nos escritorios de clientas/es, seguidoras/es e prescritoras/es e “estar” no seu ángulo de visión, non só mes a mes, senón tamén día a día.

A súa alta funcionalidade e o amplo abano de posibilidades creativas que ofrece, dan aos calendarios un valor indubidable como fórmula de márketing.

Para conseguir distinguirse non hai receitas infalibles pero si ingredientes básicos: o deseño e o papel empregado son, unha vez máis, un plus no resultado final.

As empresas que apostaron por esta fórmula xogaron coa creatividade, a calidade e o factor sorpresa para fidelizar a súa comunidade e lograr que esta se sinta parte delas, pola súa forma de facer, crear e transmitir.

Basta con dar un redobre de campás co deseño, elixir o mellor soporte para a creatividade e deixar ao público con ganas de máis.